gipuzkoakultura - argitalpenak

Non, nondik, alde, aurka, Gabriel Villota Toyos-en liburua

2008-07-04T07:40:18Z

Gabriel Villota Toyosek Non, nondik, alde, aurka. Arteari buruzko euskal kronikak mendearen hasieran liburua aurkeztu du berriki. Bi bide proposatzen ditu Euskal Herriko eremu artistikora iristeko, egilearen testu hautatuak abiapuntu hartuta.

]]> Alde batetik, egileak 2000. eta 2004. urteen artean Gara egunkariko Mugalari gehigarrian argitaratu zituen zutabeak dauzkagu, gure iragan hurbilaren arte eta kultur lagintzat jo daitezkeenak.

Bestetik, besteak beste, Txomin Badiola, Jon Mikel Euba eta Azucena Vieites artistei buruzko lanak jaso dira, bertakoaren eta globalaren arteko harremanak aztertu eta gaiari buruzko ikuspegia osatze aldera.

Zutabeek nahiz testuek panorama aldakorrera gerturatzen gaituzte; bertan, egileak ez ditu begiz galtzen unean uneko kultur politikak, eta beti agertzen da behar bezain argi, horrela, lanerako material gisa, konplexutasun soziala eta kulturala dituen sorkuntzaren errealitateari pultsua hartzeko.

Liburua Artelekuk argitaratu du eta artikuluen hautaketa lana Arturo/fito Rodríguezek egin du.

Try Again, katalogoa

2008-07-03T08:05:31Z

Irailaren 27a arte, ikusleak jokalari bihurtzen dituen erakusketa dugu ikusgai KOLDO MITXELENA Kulturuneko Erakustaretoan: Try Again. Eta erakusketaren osagarri gisa, katalogoan lanen fitxak bildu ditugu. Baina ez hori bakarrik...

]]> Artista eta lanen fitxez gain, bideojokoen kulturarekin lotutako testuak biltzen ditu Try Again erakusketaren katalogoak; besteak beste, bideojokoen historia, eta generoarekin eta sexualitatearekin lotutako kontuak ditu aztergai katalogoak.

Lanak antolatzerakoan, erakusketaren ideia berari eutsi zaio: ez da inolako hierarkia estetikorik ezarri. Artistak -musika, performance, edo zinemaren arlokoak diren kontuan hartu gabe- eta kritikariak alfabetoaren hurrenkeran agertzen dira.

Hala azaltzen du erakusketaren komisario Juan Antonio Álvarez Reyesek Simulazioa, indarkeria eta arriskua versus ikusle, jokatzaile eta testuingurua testuan:

"Bideojokoak -sortuak, zabalduak eta kontsumituak diren baino testuinguru zabalago batean- ideologia hedatzeko eta mundu-sistema ulertzeko tresna indartsu bihurtzen dituzten zenbait ezaugarri propio eta espezifitate dituzten orainaren azterketa bati ekiteko balio lezaketen zenbait alderdiren azterketa kultural eta ikusizko proiektu bat da hau. Beraz, proiektu hau ikusizko joko interaktiboaren kulturan zentratuta dago eta ez dago, aldi berean. Joko horietatik abiatzen da azterketa-kasu moduan, berehalakoan ulertzeko eratzaileak zaizkion zenbait kontu, aldi berean, orain honen parte kontzeptualak direla. Horrekin batera erakusketa ere bada, baina ez hori bakarrik, haren esparrua erabat gainezkatuta suertatzen baita, ez duelako erabat balio gailu gisa eta egitura gisa, abiapuntu inklusibo gisa preseski erakusketa-eredua erabiltzen bada ere. Hala, katalogo-liburu gailuak isla dezake ia modurik onenean proiektuaren izaera globala, erakusketari dagokionaz harago doana hierarkia estetikoen absentzia islatzea ahalbidetzen duelako, erakutsitakoa “demokratizatu” egiten duelako, eta horretarako jotzen da ordena alfabetikoaren sistemara, zeinean mota desberdinetako testuak, kontzertuak, filmak, bideojokoak, instalazioak, bideoak, performanceak edo dokumentalak azterketa-kasu moduan baitaude hor, eta narrazio bateratu baten parte moduan".

Juan Antonio Álvarez Reyesen testuaz gain, ondokoak ditu katalogoak:

-Lehen Hitzorduak eta Ipuinetako Amodio Istorioak testuan, bideojokoen sexualitatea aztertzen du Mia Consalvok.
-Kontrajokoa testuan, mod artististikoak deritzenei buruz ari da Alexander R. Galloway. Hau da, diseinua, jokoaren arauak edo pertsonaien portaera aldatuz, artistek bideojoko komertzialetan egiten dituzten moldaketei buruz.
-Arauak eta fikzioa testuan Jesper Juulek arau eta fikzioaren arteko harremana aztertzen du. Bere hitzetan, arauek eta fikzioak batak besteari eragiten diote, elkarren artean lehiatzen dute, baina aldi berean, elkarren osagarri ere badira.
-Bideojokoak: gaur egun arteko testuan, azkenik, bideojokoen historia laburtzen dute Gust de Meyer-ek eta Steven Mallie-k. Hainbat epetan zatitu dute bideojokoen historia, bakoitzak bere joera eta ezaugarri bereziak dituelarik.

Katalogoa irakurri eta, nola ez, irailaren 27a arte KOLDO MITXELENA Kulturuneko Erakustaretoan ikusgai dagoen erakusketa bisitatzera gonbidatuta zaudete.

-Try Again erakusketaren katalogoa (PDF, 2,4 MB)

Irakurketa gida guztiak klik bakarrean

2008-06-24T08:18:36Z

KOLDO MITXELENA Kulturuneko Liburutegiak urte hauetan egindako irakurketa gida guztiak biltzen dituen webgune berritua sarean da, irakurketagidak/gipuzkoakultura.net helbidean. Gida guztiak bateratzeaz gain, www.gipuzkoakultura.net webgunean zuzeneko lotura jarri dugu.

]]> Gida hauetan literatura egile ezagunei buruzko aipamen biobliografikoak eta iruzkin kritikoak aurkituko dituzue. Ia guztiak KOLDO MITXELENA Kulturunean izandako ekitaldiekin batera sortu dira. Horietako batzuk aldizka egindako hitzaldi eta erakusketen lagungarri izan dira eta beste batzuk Donostiako Liburutegi Nagusiarekin elkarlanaren ondorio.

Orain arte, www.gipuzkoakultura.net webgunean egile batzuen gidetarako lotura zuzenak zeuden eta aldiro aldatzen ziren. Orain, gida guztiak alfabetikoki biltzen dituen webgunera zuzenean sartzeko aukera duzue.

Gainera, gida batzuk berritu egin ditugu, guztiak irisgarriak izan daitezen. Hau da, W3Cko (World Wide Weberako Partzuergoa) kide den WAIk ezarritako irisgarritasun arauak bete ditugu, edozeinek erabili ahal izateko, muga teknologiko eta pertsonalak alde batera utzita.

Jon Mirande, Lauaxeta, Orixe... berritu ditugun gidetako batzuk bakarrik dira. Baina gogoratu guztiak klik bakarrera dituzuela irakurketagidak/gipuzkoakultura.net helbidean.

Behar gorria Primavera azul. Katalogoa

2008-04-30T14:30:07Z

Prest dugu Manu Muniategiandikoetxea artistaren Behar gorria Primavera azul erakusketaren katalogoa. Maiatzaren 10a arte izango dugu ikusgai erakusketa hau KOLDO MITXELENA Kulturuneko Erakustaretoan, eta esku artean dugun katalogoa osagarri ezin hobea da.

]]> Erakusketan ikus ditzakegun lanen argazkiak artista beraren azalpenekin osatzen ditu katalogoak. Horretaz gain, ondoko testuak ditu, euskaraz, gaztelaniaz eta ingelesez:

- ABCD de las Artes y las Letras aldizkariko kazetari Javier Díaz Guardiolak erakusketa hasi baino lehen egindako elkarrizketa, Egiaren ordua izenburupean. Horrela laburtzen ditu erakusketaren muina eta artistarentzat duen esanahia, elkarrizketaren sarreran:

"Nahiz eta Koldo Mitxelenako hitzordu hau arestiko proiektuen berrirakurketan oinarritu, horietatik hainbat izaera publikokoak, orain barne hartuko dituen espazioaren araberakoa, haren autoreak, Manu Muniategiandikoetxeak (Bergara, 1964), ez du atzera begiratze moduan ikusten: “Justu alderantziz da”, ohartarazten du. “Erakusketa hau beste edozein baino askoz arriskutsuagoa da niretzat, askoz konprometituagoa. Nire energia osoa dago hemen; sortzen zaizkidan arazo guztiak, eta hutsegiteak, ahuleziak, kontraesanak erakustean identifikatuago eta eraikuntzaren prozesu osoan askoz inplikatuago sentitzen naiz”. Horrela definitzen du euskal sortzaile honek Behar gorria. Primavera azul. Erakusketa honetan bere diskurtsoa artikulatzen duen mekanismoaren barrenak erakusten ditu, bai agertu ere bere egungo gogo aldartea eta artista gisa egindako lanean marruskatze puntu bat, muga bat, mugarri bat iritsi izanaren sentipena".

-Harkaitz Canok etorkizunera begira idatzitako testua: Mexikoko urteak.

-Peio Aguirreren testua: Forma, egitate soziala.

Oraindik baduzue erakusketa ikusteko aukera. Maiatzaren 10etik aurrera, katalogo honetan, paperean, gordeko dugu bertan ikusitakoa.

Hainbat urteren katalogoa

2008-04-24T08:10:48Z

Esku artean dugu ekainaren 14ra arte KOLDO MITXELENA Kulturuneko Ganbara aretoan ikusgai dagoen Kemen isuria erakusketaren katalogoa.

]]> Alvaro Matxinbarrenaren erakusketa honek hainbat urte hartzen ditu barne; eta proposatzen zaigun espazioa inbaditu beharreko eta ezkutatu beharreko espazio moduan aurkezten da. Normalean lanez betetzen dena tapatu egingo du kontainer bat gogora dakarren pieza gogor misteriotsu batek. Urte guzti hauetako kontainerra pieza igerikari, ia itsu, denboraz eta odolez betetako pieza bihurtua.

Katalogoak ere hainbat urte hartzen ditu barne. Erretratua atalean hainbat argazki azaltzen zaizkigu (Bidasoa, langela, hainbat lan, amaren familiaren etxeko lorategia...). Ondoren, azken urteetako hainbat proiekturen irudi eta azalpenak biltzen ditu katalogoak.

Juan Pablo Huercanosek Matxinbarrenaren azken urteetako bideari begiratzen dio Alvaro Matxinbarrena, Formaren muga testuan. Hain zuzen ere, 1998tik aurrerako bideari:

Errealaren hitzez hitzezko itxuraren azken lekukotza Alvaro Matxinbarrenaren lanean 1998an egin zituen lanetan aurki daiteke. Une hartatik aurrera, haren sortze lana geometria, lerroa, monokromoa eta espresioaren seriotasunarekiko txera definituago bat erakusten hasi zen. Ibilbide horretan, bidaia horretan, haren lanean behin eta berriz agertzen den borondate bat egiaztatzen da: formak mintzaraztea. Hartara, egileak prozesu luze batean eraikitzen ditu bere lanaren edukiak, hainbat une eta eszenatoki zeharkatuta eta formaren atalasean, formaren mugan espresioa garatuta.

Azken urteetako errepasoa eginez, Ganbaran ikusgai dugun piezara iristen da.

(...) Bertan, oraindik oraintsuko bere lanetara atzera begiratu bati ekiteko aukera barik, artistak berriro planteatzen du lan bakar baten, lan osatu baten nahia, erakusketa honetarako eraikitako piezaren bidez, ziklo oso hori ixten duena. Apenas irekita dagoen gela baten barruko gela hau haren izaera artistikoari lotutako dualtasun horren gainean sustengatzen da. Objektu irekia da, zeharkaezina baina: espazio eraiki baina bizi ezin bat, forma mugikor baina gelditu, latente bat. Berriro muga, ideala. Amildegiaren materia.

Azkenik, Alvaro Matxinbarrenaren lanen zerrenda osoa biltzen du katalogoak: banakako erakusketak, taldekako erakusketak, bekak, bildumak, bibliografia, katalogo eta hitzaldiak, berari buruz prentsan azaldutakoak, komisario lanak eta koordinatzaile lanak.

Kemen isuriaren katalogoa (PDF, 3,4 MB)

2007ko memoria

2008-04-02T10:06:30Z

Esku artean dugu KOLDO MITXELENA Kulturunearen 2007ko memoria. Bertan, urtean zehar izan ditugun jarduerak, erakusketak, argitalpenak eta liburutegiari buruzko estatistika datuak bildu dira lau atal nagusitan: Erakusketak; Jardunaldiak, zikloak eta hitzaldiak; Argitalpenak; eta Liburutegia.

]]> KOLDO MITXELENA Kulturunea Gipuzkoako hedapen artistikoaren erreferente nagusietarikoa da, eta arte garaikideko hainbat erakusketa hartzen ditu urte osoan, bereziki horretarako dituen bi aretoetan: Erakustaretoan eta Ganbaran. 2007an izandakoen nondik norakoak azaltzen dira memorian.

Erakustaretoak egungo artea erakustea du helburu. Urtero bospasei erakusketa izaten ditu ikusgai, horietako batzuk tokiko ekoizpenak eta, beste hainbat, Europako erakundeekin batera antolatutakoak. 2007an ondokoak izan dira:

-Dokumentuak, etorkizuneko memoria
-Sin fin. Islaren isla
-Soinu dimentsioa
-Artista Berrien XLII. Lehiaketa
-Eraiki, Bete Hustu. Espazioaren erabilerak

Ganbarak, bestalde, euskal artista adierazgarrien lana berrikustea eta gaikako erakusketak hartzea du helburu. Honatx 2007koak:

-Suite Èrotique
-Isidoro Guinea eta dekorazio arteak
-Bizitza pintatua
-Batekmila-Euskal munduak
-Biluzik

Jardunaldien atala zabalagoa da. Izan ere, era askotako kultura-ekitaldiak egiten dira egunero Areto Nagusian. Horrez gain, KOLDO MITXELENA Kulturuneak kulturarekin zerikusia duten jardunaldi, ziklo eta hitzaldiak antolatzen ditu hainbat erakunderekin batera. Horietako batzuk ohiko hitzordu bilakatu dira, apirileko Iparraldea Bertan! zikloa esaterako.

2007an argitaratutako lanak ere bildu ditu memoriak. KOLDO MITXELENA Kulturuneak kultur arloko argitalpen ugari egiten du urtero. Alde batetik, erakusketa guztien katalogo artistikoak argitaratzen ditu. Bestalde, ziklo eta jardunaldietan azterturiko egileen biografia, bibliografia eta iruzkinak jasotzen dituzten irakurketa-gidak ematen ditu argitara, bai paperean, bai euskarri digitalean. Auspoa bildumak ere aurrera jarraitu du bere ibilbidean, eta 300 aletik gora du honezkero.

Liburutegiari dagokionez, Zerbitzuen Kartaren bidez hartutako konpromisoen emaitzek eta liburutegiko estatistikek urtearen laburpena eskaintzen digute.

2007ko kontu guztiak laburpen eta argazkiz lagunduta gogoratzeko, honatx memoria:

-2007ko memoria (PDF, 6,1 MB)

Gipuzkoako Artxibo Orokorraren liburu digital berria, industria-arkitekturari buruzkoa, irudiduna

2008-03-31T09:32:14Z

Dagoeneko eskura duzue Gipuzkoako Artxibo Orokorrak argitaratu berri duen e-liburu berria. Dagoeneko gozatu dezakezue bere testu eta irudiekin. Amaia Apraiz eta Ainara Martínez dira egileak. Biak Artearen Historia doktoreak dira eta Foru Aldundiak urtero ematen dituen ikerketa historikorako beka batekin Gipuzkoako industria-arkitektura aztertu dute. Horren emaitza da Arquitectura industrial en Gipuzkoa e-liburua.

]]> Lanak Tolosa, Eibar eta Donostia ditu ardatz, baina, hala ere, Gipuzkoako beste hiri batzuetako irudi asko ditu. Ez bakarrik eraikinak -desagertu direnak zein zutik dirautenak-, baizik eta bestelako dokumentu grafiko asko ere: eraikitzeko proiektuak, argazki zaharrak, industria horien publizitatea, zigiluak... Hementxe dituzue horietako batzuk, baina beste asko daude:

Bekak/Becas bildumako seigarrena den liburu honetan murgildu aurretik, egileek egiten duten aurkezpena (gaztelaniaz) irakur dezakezue:

El objetivo principal de este trabajo de investigación es estudiar la arquitectura de la industria guipuzcoana desde el punto de vista de la Historia del Arte, rastreando la influencia que en ella pudieran tener los estilos artísticos. Con ello se pretende realizar una aproximación diferente a la arquitectura contemporánea en Gipuzkoa, aproximación centrada en su patrimonio industrial, de un gran valor histórico-artístico pero, a día de hoy, escasamente estudiado y valorado.

El periodo de estudio se ha centrado en la primera gran industrialización guipuzcoana, entre 1876 y 1936, un periodo en que la arquitectura se pone al servicio de los avances tecnológicos, al tiempo que, partiendo de la máxima de que “lo útil es bello”, combina funcionalidad y estética. De esta manera, incidimos en las relaciones entre industria y modernidad artístico-arquitectónica, tratando de abrir nuevas vías de estudio que facilitan enfoques novedosos en el conocimiento de la Historia del Arte y la Arquitectura en Gipuzkoa.

Es en este momento en que Gipuzkoa está readaptando su perfil industrial, cuando debía plantearse la necesidad de recordar lo que ha sido, es y será este territorio histórico. Su vida industrial, proyectada en la morfología urbana de sus municipios, en sus edificios y, por qué no, en sus gentes, es la base en la que insertamos este estudio, centrado en los municipios de Tolosa, Eibar y San Sebastián.

Nuestra investigación ha tenido en cuenta principalmente el estudio de fuentes documentales conservadas en los archivos del Territorio Histórico de Gipuzkoa con el fin de aportar una visión rigurosa de este patrimonio. Así, la principal aportación de este trabajo ha sido a la localización de material gráfico (esencialmente planos, pero también membretes y fotografías), con el que se ha dado a conocer la participación de los arquitectos guipuzcoanos —los mismos que tomaron parte en la configuración urbana y en la construcción de edificios civiles— en la arquitectura industrial.

En un contexto más general, esta visión es particularmente interesante ya que la industrialización del Territorio Histórico de Gipuzkoa aún no había sido estudiada con seriedad desde la Historia del Arte y de la Arquitectura, disciplinas que se han empleado como mero acompañamiento del enfoque histórico-económico, reduciéndose a la mención de aspectos decorativos y de fachadismo, sin profundizar en las motivaciones estéticas que pudieron impulsar a empresarios, arquitectos, ingenieros y maestros de obras. Se pone de esta manera en evidencia algo que a menudo queda olvidado: el carácter pionero de la arquitectura industrial como introductora de determinadas corrientes arquitectónicas, artísticas y estilísticas, y muy especialmente en las poblaciones alejadas de los núcleos capitales de la Historia del Arte.

En definitiva, el acercamiento a la Arquitectura Industrial en Gipuzkoa pretende abrir nuevas vías de estudio y facilitar nuevos enfoques en el conocimiento de la Historia del Arte y de la incidencia de las corrientes de la Modernidad, tanto en Gipuzkoa como en el conjunto de Euskadi.

Hauspoari eraginez...

2008-03-12T10:44:48Z

Auspoaren hauspoa nekazezina da. Antonio Zavalak hasi zuen argitalpen bildumak aurrera darrai.

]]> Oraingoan 308 eta 309 zenbakiak iritsi zaizkigu esku artera. Eduki anitzeko bi argitalpen berri.

Sasi guztien gaiñetik Nikolas Zendoiaren hirugarren liburua da, Pello Esnalek editatuta. El Diario Vasco egunkarian argitaratutako 62 artikulu eta bertso biltzen ditu. Eta igandean, hilak 16, Erramu Eguna izango dugunez, hona hemen egun horrekin zerikusi zuzena duen adibide bat:

"Orain ez diogu hainbeste jaramon egiten Erramu Egunari, baiña gure gazte-denboran Erramu Eguna egun aunditzat eduki oi genuen, batez ere gazteak. Gure erramu-festa ura egiteko, alegia.

Oraintxe bezalaxe, atzera-aurrera aundia ibiltzen zuen Erramu Egun eta Aste Santu dalako orrek.
Zergatik nioen erramu-festa? Orduan, erramu adar-aundiak eramaten genituen elizara, meza nagusian. Aundiak bakarrik ez. Zeiñek ederragoak eraman ibiltzen giñan. Zeiñek loretsuagoa, alegia. Orrexegatik nioen.

Erramu Eguna goiz baldin bazan, lorerik ez zuen izaten. Edertasunik gabeko erramuarekin joan bear elizara urte artan. Eta norbaitek eramaten bazuen loreduna, ura zan urte artako irabaztuna. Kanpeioa! "Nun kristotan billatu ote dik orrek ori?". Amorrua ere artzen genion dalakoari".

Bigarren liburua, 309 zenbakia, Agindua zor da. Bertan Joxe Aierberen lanak bildu ditu Joxemari Iriondok: bertsoak, El Diario Vascon argitarartutako artikuluak eta bestelako prosa lanak.

Honatx adibidea:

"Derriorrezko euskalduntzea Ukaeziña da gaurregun Euskera izkuntza ikasi nairik dabiltzanak millaka dirala. Egia da, baitere, iñoiz baiño laguntza ta erreztasun gehiago eskeintzen zaizkiola nai duanari. Biña, ala ta guztiz ere, denbora ez ezik dirutzak eramaten dizkio azkenerako lan ortan asten danari. Pertsona eldua euskalduntzea, euskeraduntzea, izan ere, ez baita bi egunean lortzen dan gauza. Orregatik, alde batetik eziñak eta beste aldetik etsipenak jota geldituak askotxo aurki genitzake. Askoren iritziz -gu ere ortan gaude- euskera ikasi nai duanak, ez luke xentimorik ordaindu bear. Bakoitzaren erantzukizuna eta almena gogoan izanik, bidezko epe batean, aukera ori eman bear litzaioke. Ez dezala iñork esan aukerarik etzaiola eman. Orrek, ordea, zalantza bat sor arazten digu: nolakoa izango litzake jendearen erantzuna? Oso bestelakoa, agian."

Bertan. Baserria

2008-03-04T18:00:51Z

BERTAN bildumaren digitalizatze prozesuaren harira, Baserria izeneko alea digitalizatu berri dugu. Aurrekoetan bezala, HTML eta PDF formatuetan duzue eskuragarri, euskaraz, gaztelaniaz, ingelesez eta frantsesez.

]]> BERTAN argitalpen monografikoen bilduma da; Gipuzkoako kultura- eta paisaia-ondarearekin lotutako gaiak lantzen ditu, era erakargarri eta atsegin batean. Orain arte 22 ale argitaratu dira eta oso harrera ona izan dute. Horietako askoren paperezko bertsioa agortuta dago, baina pixkanaka, guztion eskura jartzen ari gara sarean.

Oraingoan Baserria ardatz duen monografikoa digitalizatu dugu; bertan ondoko gaiak aurkituko dituzue: Baserriaren historia, Jabetza eta heredentzia, Baserria nola egiten zen, Bizitza eta lana baserrian, Aitaren etxea defendatzea, Baserri motak, eta Apaingarriak.

Webgune berria sarean

2008-02-28T09:19:45Z

KOLDO MITXELENA Kulturunearen webgune berria sarean da. kmk.gipuzkoakultura.net helbidean KOLDO MITXELENA Kulturunean gertatzen den eta eskaintzen dizuegun guztiaren berri aurkituko duzue.

]]> Hasiera orrian liburutegiari, Ganbara aretoari, Erakustaretoari, argitalpenei eta jarduerei buruzko azken berriak aurkituko dituzue. Bertatik albiste zaharragoetara eta webgunearen gainontzeko ataletara jo dezakezue.

Liburutegiari dagokion atalean, katalogoa, online zerbiztuak eta bestelako datu jakingarriak aurkituko dituzue, ordutegia edo mailegurako baldintzak, esaterako.

Ganbara eta Erakustaretoa ataletan, hasieratik izan diren erakusketak (urtearen arabera edo hitzez bilatu ditzakezue) eta katalogoak, datozen erakusketak eta aretoei buruzko bestelako informazioa (ordutegia, telefonoa, espazioa...) aurkituko dituzue.

Areto Nagusiari dagokionez, jardueren egutegia ikusi eta aretoa eskatzeko aukera duzue.

Gainera, webgune irisgarria da. Hau da, webgunea egiterakoan W3Cko (World Wide Weberako Partzuergoa) kide den WAIk ezarritako irisgarritasun arauak bete ditugu, edozeinek erabili ahal izateko muga teknologiko eta pertsonalak alde batera utzita. Beraz, KOLDO MITXELENA Kulturuneari buruzko informazio guztia guztien eskura dago.

Ikuspegi eta hitzen katalogoa

2008-02-26T09:41:19Z

Otsailaren 20tik, Gonzalo Sánchez arte-galerista zenaren omenez antolatutako Ikuspegiaren arrastoa erakusketa dugu ikusgai KOLDO MITXELENA Kulturuneko Ganbara aretoan. Eta erakusketaren osagarri gisa, katalogoan artelanen irudiak eta beste kontu asko bildu ditugu.

]]> Gonzalo Sánchezek Galería Dieciséis arte-galeria sortu zuen 1983an eta hil arte kudeatu zuen. 2007ko udaran hil zen, ustekabean, gaixotasun azkar batek eramanda. Galeriaren bitartez artista gazte asko bultzatu zituen, eta orain artista horiek omenaldi bat antolatu nahi izan diote. Hala azaltzen du galeristaren lagun eta erakusketaren komisario Carmen Alonso-Pimentelek katalogoaren aurkezpenean:

Erakusketa hau Gonzalo Sánchezen omenez antolatu da. Gonzalok Galería Dieciséis izeneko bere arte-galerian bide bat jorratzeko lehenengo urratsa egin zuen, egitasmo koherente eta ezin hobeto definitua eta ibilbide paregabea zituela. Egun hauetan, erakusketako komisarioa izanda artistekin harremanetan jartzen ari bainaiz, ohartu egin naiz nolako estimu eta miresmena sortzen dituen Gonzalok artista horiengan. Artista guztiak bat datoz Gonzalok Donostiako bizitza artistikoan izan duen eginkizunari buruz beren iritziak ematean, eta pozik onartu dute erakusketan parte hartzea. (...)

Ganbaran ikusgai dauden artelanen irudiez gain -lau eskultura eta 26 pintura- Gonzalo Sánchez gogoratzen duten testuak biltzen ditu katalogoak. Ikuspegiaren arrastoa testuan galeriaren “barnealdea” deskribatzen du Carmen Alonso-Pimentelek, alegia, Gonzalok zer irizpide izan zituen euskarri galeria sortzeko, jarraitu nahi zuen estetika-ildoa zehazteko, galeria kudeatzeko eta abarretarako. Ereduzko galeria eta galeria zuzendaria testuan, bestalde, galeriaren “kanpoaldea” nabarmendu du Edorta Kortadik: Gonzalo Sánchez Donostian finkatu zenean, hiriburuan zegoen arte-giroa, galeria-jabeak erakundeekin eta gainontzeko galeriekin izan zituen harremanak... Labur esanda, Gonzalo Sánchezek Donostian burutu zuen eginkizun kulturala.

Galerian izandako hainbat artistak Gonzalo Sánchez omentzeko idatzitako hitzak ere biltzen ditu katalogoak. Horrela gogoratzen du, esaterako, Rosa Valverdek:

Gonzalo Sánchezi agur

Gonzalo ezagutu nuenean gainditu nuen merkatuak eta Arte galeriek eragiten zidaten arbuioa. Lehen unetik bertatik, dena oso argi ikusi nuen. Lankidetzat nahi nuen munduko pertsona bakarra zen. Barre asko egiten genuen. Fisikoki, oso erraz ezagutzen zen: handia, ederra, jaun erromatarren antzekoa. Begiak batzuetan biziak zeuzkan, eta besteetan malenkoniatsuak. Humanista eta idealista zen, eta Donostian eta Espainian izen handia zeukan. Bere erakusketetan era anitzetako proposamenak zeuden, eta oso nortasun artistiko ezberdinetako artistak; hori bai, beti maila gorenekoak. Artistak zorroztasun handiz aukeratzen zituen. Bezeroekin, berriz, oso xumea zen eta nahiago izaten zuen lasaitasunez saldu.
Lanarekin gozatzen zuen bizitzaz; dena berez egiten zuen. Gustu paregabea zeukan eta perfekzionista zen, argitaratu zituen katalogoak lekuko. Amable Arias jeinuzko artista birbultzatuz, lan bikainak egin zituen.

Bihotzeko laguna, edukazio onekoa, leiala, fidela, kutuna, maitekorra eta hainbeste dibertitzen ninduena, zenbat sentituko dudan zure hutsunea!

Azkenik, urtez urte Galería Dieciséis arte galerian izandako erakusketen zerrenda aipatzen da, 1983ko lehenengotik 2007ko azkenera, Galeriak ARCOn egindakoekin eta Gonzalo Sánchezen beste lan batzuekin batera. Hauen lagungarri, erakusketa horietako batzuen gonbidapen txartelak ere bildu dira. Ondokoak, esaterako:

Erakusketa apirilaren 5era arte egongo da ikusgai Ganbara aretoan. Ondoren, ikuspegiak eta hitzak gure oroimenean eta katalogoan gordeko dira.

Zehar 62. Hiri ekoizpenak

2008-01-29T12:39:54Z

Argitaratu berria den Zehar aldizkariaren 62. alea itxura berrituta eta edukiz beteta dator. Argitalpenaren editore Maider Zilbetik gonbidatutako kolaboratzaileek egungo hiri ekoizpenen inguruko hausnarketak egin dituzte.

]]> Hala diote editorialean: "Hemen bata bestearen alboan kokatzen diren hiri-ekoizpenak gogoeta kritiko batetik sortzen dira, inguratzen gaituenaz, espazioak inguratzen gaituena nola ordenatu, hierarkizatu eta esanahia ematen dion gogoetagai hartuta. Inter-subjektibotasunetik gogoetarako esparru publiko bat eraikitzea da prozesu horren helburua. Esparru horrek, espazio bai fisiko bai diskurtsiboa bera, zirkunstantzien arabera, espazioaren ikusmolde aldakor bat proiektatzen digu, espazioaren arkitektura eta hortik inposatzen diren harremanak eraldatzeko ahalmena duena. Horri esker abiapuntu desberdinetatik koka gaitezke espazioan, helmugarik zertan izan gabe".

Zehar aldizkariaren ale berrienean bildutako testuak eta irudiak online kontsulta ditzakezue.

Antzinako bidaia epiko eta mitikoak

2008-01-16T09:09:06Z

Azaroaren amaieran Antiqua Antzinari Buruzko XIV Jardunaldiak izan genituen KOLDO MITXELENA Kulturunean. Adituek antzinako bidaia epiko eta mitikoei buruz hitz egin zuten. Ez bazenuten etortzeko aukerarik izan, orain Antiquaren webgunean irakurri ditzakezue hitzaldiak.

]]> antiqua.gipuzkoakultura.net helbidean orain arte izandako jardunaldi guztien zerrenda aurkituko duzue. Azkenekoak 2007koak dira: Antzinako bidaia epiko eta mitiko batzuk. Bertan aurkituko dituzue gai honen inguruan izandako hiru hitzaldiak:

-Los viajes de Ulises y de Jasón. Carlos Garcia Gual. Filologia Grekoko Katedraduna. Complutense Unibertsitatea. Madril.

-Poema de Gilgamesh: un viaje fallido a la inmortalidad. Federico Lara Peinado. Irakasle Titularra. Complutense Unibertsitatea. Madril.

-Sinuhé: el viaje hacia la muerte en el Antiguo Egipto. Jose Miguel Serrano Delgado. Antzinako Historia Irakasle Titularra. Sevillako Unibertsitatea.

Hitzadi hauek sarean irakurri edo ordenagailura jaitsi ditzakezue PDF edo word formatuan.

Biluzik

2007-12-19T09:38:28Z

Dagoeneko prest dugu otsailaren 2a arte KOLDO MITXELENA Kulturuneko Ganbara aretoan ikusgai dugun Biluzik erakusketaren katalogoa.

]]> Miguel Ángel Álvarezen marrazki eta olio-lanen irudiez gain, ondoko osagarriak ditu katalogoak:

-Artistaren aurkezpen biografikoa, Mayi Setién erakusketaren zuzendari artistikoak idatzita.

-Artistaren lagun Jorge G. Aranguren poetak idatzitako testua: Sentsualitate sublimatua: Miguel Ángel Álvarez biluziak.

-Castillo Suarez idazlearen testua: Erauziko dizkizut belarritakoak.

Azken honek Miren Agur Meabe idazlearen pasarte honekin hasten du bere testua:

Azala, neurri batean, paper bat da, barruko kanpora ateratzen eta kanpokoa barneratzen duen papera. Eta kode berezi batek araupetzen du, ez duelako arau finkorik: norberak asmatzen, egokitzen edo aldatzen du. Pertsonala da, eta eskutik eskura pasaezina. Isila da eta dena dio.

Oraindik baduzue erakusketa ikusteko aukera. Otsailaren 2tik aurrera, katalogo honetan, paperean, gordeko dugu bertan ikusitakoa.

Berrikuntzak XIX. mendeko albuma webgunean

2007-12-17T12:27:18Z

Gipuzkoako Foru Aldundiko Kultura eta Euskara Sailak XIX. MENDEKO albuma kultur webgunean ilustrazio gehiago bildu eta lau hizkuntzatara egokitu du.

]]> Egun, Euskal Herriko gaiei buruzko 3.200 irudi baino gehiago dauzka albumak. Irudi hauek Foru Aldundiaren funtsetakoak dira eta Gipuzkoako bost dokumento-zentrotan daude: Zumalakarregi Museoa, Koldo Mitxelena Kulturuneko Liburutegia, Gipuzkoako Artxibo Orokorra, Gipuzkoako Protokoloen Artxibo Historikoa eta Untzi Museoa.

3.200 irudiek ondoko datuak bitzen dituen azalpen fitxa dute: egilea, grabatzailea, inprimategia, data, tokia, irudiaren neurriak, eta abar. Informazioa lau hizkuntzatan aurkezten da, kontsulta euskeraz, gazteleraz, ingeleraz eta frantzesez egitea ahalbidetuz. Gainera, dokumentuaren jatorrizko hikuntzan ere ikusi daitezke datuak.

Albumari buruz
XIX. MENDEKO albuma Zumalakarregi Museoaren, XIX. mendeko Euskal Herriaz jakiteko eta gozatzeko erreferentzia zentroaren, ekimen berritzailea da. XIX. mendea ikertu eta ezagutu, zein garai bat erakusten duten irudiekin gozatu nahi duen edozeini zuzenduta dago. Hiritarrei gure funtsak modu erraz eta arin batean eskuratzeko aukera eskaintzen die, erresoluzio kalitatearen arabera, irudiak maileguan eskatzeko edo lortzeko bidea emanez. Aldez aurretik, irudien bilaketa egin daiteke ondorengo irizpideak erabiliz: egileak, pertsonaiak, tokiak eta gaiak.

Gainera, kultur webguneak erakusketa birtualei zuzendutako txokoa du; bertan, XIX. mendeko gai zehatzak erakusten dira irudien bitartez.

Petit de Meurveille
Horietako bat da Petit de Meurville-Gipuzkoako flora erakusketa birtual berria. Didier Petit de Meurvillek, Donostiako kontsul eta lore zaleak, XIX. mende erdialdean egindako loreen irudiak eskaintzen ditu erakusketa honek.

Egilea hiriko eta inguruetako paisaien irudi ugari egin zituen, probintziako loreei arreta berezia eskainiz eta kalitate haundiko irudiekin hiru album osatuz. Irudi hauek albumez album, Petit de Meurville berak burutu bezala, edota loreen habitataren arabera aztertu daitezke.