Astelehenean, hilak 12, Jorge Oteiza (1908-2003) zikloko lehen jardunaldia izango dugu KOLDO MITXELENA Kulturunean. Pedro Manterolak Oteizaren lanei buruzko interpretazioa plazaratuko du. Asteartean, hilak 13, mahai-ingurua izango da, Oteizarekin harreman zuzena izan zuten zenbait artistarekin.

Aste osoan zehar izango dira Jorge Oteizari buruzko jardunaldiak KOLDO MITXELENA Kulturuneko Areto Nagusian, 19:30ean hasita. Artista oriotarra jaio zeneko mendeurrenaren harira antolatu da Jorge Oteiza (1908-2003) zikloa, artista honen alderdi desberdinetan sakontzeko.

Astelehenean, maiatzak 12, Pedro Manterolak, artista, irakaslea eta 2007ko urtera arte Oteiza Museoaren zuzendaria izan denak, Oteizaren lanei buruzko interpretazioa plazaratuko du bideokonferentzia bidez, Grandeza y miseria de Oteiza izenburupean.

Asteartean, maiatzak 13, En torno al vacío de Oteiza mahai-ingurua izango da. Edorta Kortadi irakasle eta arte-kritikariaren gidaritzapean Oteizarekin harreman zuzenak izan zituzten artistei hitza emango zaie eta garaiko kezkak, ametsak eta eginkizunak azalduko dituzte. Ondoko artistek hartuko dute parte: Nestor Basterretxea, Jose Antonio Sistiaga eta Ricardo Ugarte.

19:30ean Areto Nagusira etortzerik ez dutenek ere izango dute jardunaldiak zuzenean ikusteko aukera, KMK Zuzeneani esker.