gipuzkoakultura - ondarea

Donostia XIX. mendean. Untzi Museoak Antonio Brugadaren olio-lan bat eskuratu du

2008-07-17T11:32:51Z

Untzi Museoak XVII. mendeko Kontxako badiaren koadro bat eskuratu zuela kontatu genizuen maiatzean. Orain, bi hilabete geroago, Zurriolako hondartzaren txanda da. Izan ere, Gipuzkoako Foru Aldundiak Donostiako kaian duen Untzi Museoak Antonio Brugadaren 1858ko olio-pintura bat eskuratu du. Zurriola hondartzatik ikusitako ilunabarra agertzen da eta bertan harresiak bota aurreko Donostiaren itxura nolakoa zen ikus daiteke.

]]> XIX. mende erdialdeko Donostiako paisaiak urriak dira olio-pinturetan, eta bakan horietariko bat da Antonio Brugadaren margolan hau. Gran Vía de Bilbao etxean izandako enkantean erosi zen 20.000 eurotan eta 50x80 zentimetro ditu.

Olio-pintura hau azaroaren 2a arte Untzi Museoan ikus daitekeen Donostia, itsas hiria erakusketan dago ikusgai. Erakusketa honetan, erromatarren garaitik gaur egunera doan ibilbidea egin daiteke hiriaren historian barrena; balio historiko zein artistiko handiko hainbat pieza -hauetariko asko jendaurrean erakusten diren lehen aldia da- biltzen ditu erakusketak eta ikus-entzunezko hainbat lan ere badaude hiriaren historian murgiltzeko.

Antonio Brugada
Olio-pinturaren egilea Antonio Brugada da (Madril, 1804-Donostia, 1863), espainiar erromantizismoko lehenetariko itsas-margolaririk garrantzitsuena. Bere ekintza politikoa liberala zela eta, Frantziara joan beharra izan zuen eta 12 urtez bizi izan zen erbestean. Han Goya ezagutu zuen.

Brugada Espainiako itsas paisaia erromantikoak laudatzen aitzindaria izan zen. 1884-1885. urteetan, Donostiako Udaletxerako (Konstituzio plazan) bi mihise handi margotu zituen Antonio Okendoren omenez. Mihise hauek Pernambucon eta Dunetan izandako itsas borrokak irudikatzen dituzte, eta margolanen zati bat harpidetza publikoz ordaindu zen.

Untzi Museoaren kudeaketa eredua

2008-07-07T08:27:46Z

Untzi Museoak ekainaren 30 eta uztailaren 1ean Iniestan (Cuenca) izan diren Jornadas de Gestión de Patrimonio Arqueológico izeneko jardunaldietan parte hartu du. Bertan, El Museo Naval de San Sebastián: un modelo de gestión hitzaldia eskaini du Untzi Museoko zuzendarikide Soco Romano Aguirrek.

]]> PAICE Paisajes de la Celtiberia proiketuak bultzatu, La Manchuelako Arkeologia Museoak antolatu, eta Adiman, Cuencako Manchuelaren Garapenerako elkarteak koordinatu ditu jardunaldi hauek. Bi egunetan, hainbat adituk ondarearen kudeaketa eta zabalkundeari buruzko esperientziak trukatu dituzte, hitzaldi, mahai-inguru eta lan-taldeen bidez.

Itsas ondareari buruz

2008-06-30T09:08:37Z

Ekainaren 18an, asteazkena, Itsas Ondarea turistikoki balioestearen inguruko I. Jardunaldian parte hartu zuen Untzi Museoak, Lekeitioko Kultur Etxean.

]]> Palamos-Gironako Arrantza Museoko Zuzendari Miquel Martík eta, besteak beste, Galiziako Itsas Museoaren Aholkularitza Kontseiluko kide den Dionisio Pereira idazleak parte hartu zuten Lekeitioko Udalak antolatutako ekitaldi honetan. Soco Romano, Untzi Museoko zuzendarikidea, jardunaldiaren moderatzailea izan zen.

Turismo eskaintza kultura baliabideen bidez sustatzeko helburuarekin antolatutako Ondarea, Lekeitioko itsasargia jardunaldien barruan kokatzen da ekitaldi hau.

Bilera Madrilen
Maiatzaren 28an, bestalde, Donostiako Untzi Museoko ordezkariak Madrilgo Ontzi Museoan izan ziren, Itsas Ondarea gordetzen duten Museo eta Zentroen Elkarte bat sortzeko oinarriak prestatzeko bileran.

Untzi Museoaz eta Madrilgo Ontzi Museoaz gain, Bartzelonako Museu Maritim, Cartagenako Itsas Arkeologia Museoa eta Andaluziako Junta egon ziren bilduta.

Ezetz asmatu nor den!

2008-06-25T07:40:29Z

Asmatu al zenuten zenuten Ezetz Asmatu! bildumagarri digitalaren bosgarren alearen erantzuna? Ezagutu zenuten Pasaiako grabatua? Asmatu ez bazenuten, lasai; Zumalakarregi Museoak bildumagarriaren seigarren alea argitaratu berri du eta, beraz, hemen beste aukera bat duzue. Oraingoan, irudian azaltzen den pertsonaia nor den behar duzue.

]]> Erantzun zuzena bidaltzen baduzue museorako bi sarrera jasoko dituzue doan. Gainera, gainera, urte amaierarako ustekabe atsegin bat prestatu dugu parte-hartzaileentzako. Animatu zaitezte! Ez da galdera zaila, eta gainera, zalantzaren bat baduzue, laguntza txiki bat ere emango dizuegu.

Parte hartzeko helbidea http://zm.gipuzkoakultura2.net/ezetzasmatu/ da. Hilabetero bildumagarria posta elektronikoz jasotzeko aukera ere baduzue; horretarako mzumalakarregi@gipuzkoa.net helbidera idatzi baino ez duzue egin behar.

Karl Ferdinand Henningsenek egindako marrazkien koadernoa

2008-06-23T16:24:39Z

Karl Ferdinand Henningsenek egindako 11 marrazki soltez osatutako kuaderno ezezagun eta interesgarria eskuratu du Zumalakarregi Museoak.

]]> Orain arte ez genekien Henningsen marrazkilaria zenik. The most striking events of a twelvemonth´s campaign with Zumalacarregui in Navarre and the Basque Provinces liburuan argitaratutako Tomas Zumalakarregiren grabatuaren egilea zela besterik ez genekien.

Zumalakarregiren lehen biografoa izan zen Henningsen, eta general karlistaren figura nazioarteko bihurtu zuen. 1815ean jaio zen Eskozian eta, 19 urte zituela, bere burua bolondres aurkeztu zuen karlisten aurrean. Zumalakarregiren zalditeriko partaide izan zen eta borroka ugaritan parte hartu zuen. 1835.ean Elliot Hitzarmena sinatzerakoan diplomatiko britainiarra harritu omen zen karlisten artean eskoziar hura aurkitzean.

Zumalakarregi hil zenean, Ingalaterrara itzuli zen, bertan karlisten aldeko lana egitearren. Garai horretan, 1836. urtean, argitaratu zuen lehen aipatutako The most striking events of a twelvemonth´s campaign with Zumalacarregui in Navarre and the Basque Provinces liburua. Arrakasta handia izan zuen, eta urte gutxian alemanierara, frantsesera, italierara eta gaztelerara itzuli zuten. Britainiarren artean eztabaida ugari sortu zuen, Zumalakarregiren figura goraipatu eta karlisten aldeko jarrera nabarmendu baizuen.

1877ean hil zen, gerra guztiak galdu ondoren.

Uda Igartubeitin

2008-06-19T14:25:13Z

Ate joka dugu uda. Kostata bada ere, oraingoan eguzkia bera ere gure artean geratzeko iritsi dela dirudi. Eta jende askok aisiaz gozatzeko denbora gehiago izango du. Beraz, une aproposa izan daiteke Igartubeiti Baserri Museoa bisitatu eta XVI. eta XVII. mendeetako euskal baserrien eguneroko bizitza ezagutzeko. Udako ordutegia ekainaren 15ean hasi zen eta irailaren 15a arte egongo da indarrean:

]]> -Asteartetik igandera, 10:00etatik 14:00etara eta 16:00etatik19:00etara.

-Bista gidatuak 11:00etan, 12:30ean eta 17:00etan (70 minutuko iraupena).

Badakizue, uda honetan ez galdu iraganean murgiltzeko aukera. Hurbil zaitezte Igartubeiti Baserri Museora eta Euskal baserrien eguneroko bizitza ezagutuko duzue. Zaharberritutako eraikina jatorrizko egoeran eta garaiko altzari eta tresneriaz hornituta dago, gure arbasoen bizimodua ulertarazteko asmoz: zer jaten eta edaten zuten, nola janzten ziren, zertan egiten zuten lana... Interpretazio Zentroak euskal baserriaren historia, ezaugarriak, erabilera eta bilakaera erakusten ditu baliabide expografiko berrienak erabiliz.

Urtebeteko ibilbidea mendetako itsas historian zehar

2008-06-05T08:41:51Z

Untzi Museoaren Donostia, itsas hiria erakusketak urtebete egingo du datorren astean. 2007ko ekainaren 12an inauguratu zen eta Gipuzkoako Foru Aldundiak Donostian duen museoaren ildoan aldaketa ekarri zuen.

]]> Museoak 16 urte zituen orduan, eta formula aldatzeko une egokia zela pentsatu zuten museoko arduradunek. Hala, erakusketa iraunkorrerako erabiltzen ziren bi solairu nagusiak iraupen luzeko aldi baterako erakusketentzako espazio bihurtu ziren.

Hain zuzen ere, Donostia, itsas hiria erakusketarekin hasi zen museoaren aro berria. Hau da, Erromatarren garaitik hasi eta gaur arte, hiriaren itsas historiaren berri ematen digun erakusketarekin.

Urte bete pasa da dagoeneko, eta emaitzak oso onak dira. Erakusketari buruzko iritzi eta kritikak primerakoak dira. Gainera, taldeko eta banakako bisitari kopuruak eta bisiten iraupenak gora egin dute. Hori dela eta, hasieran erakusketa maiatzaren 28an bukatzekoa zen arren, epea luzatu egin da eta azaroaren 2a arte izango da ikusgai.

Urtean zehar, ezusteko atseginak ere izan dira. Bonaventura Peetersen Vista de San Sebastián 1652eko marrazkia azaldu izana, esaterako. Marrazkiaren gaia ikusita, ezin aproposagoa zen erakusketa honetarako. Izan ere, XIX.mendea baino lehenagoko Donostiari buruzko oso irudi gutxi daude; beraz, pieza honek balio historiko eta ikonografiko handia du hiriarentzat. Kalitate grafiko bikaineko pieza da eta garai jakin bateko Donostia erakusten du; aurreko hamarkadetan kortso-jarduerak izan zuen indarra gutxiagotua zegoen arren, itsas merkataritza hirian indartsu mantentzen zen (Amerikarekiko -Indiatako Ibiliko Ontzidien bidez- eta Europa Atlantiarrarekiko) garaia, hain zuzen.

Donostiaren itsas historia

Moilen neurri txikiak ikusirik zail egiten da Erdi Aroaz geroztik XIX. mendea arte Donostian garatu zen itsas jarduera garrantzitsua imajinatzea. Izan ere, ikuspegi honetan ahantzi egiten dugu Donostiako portu espazioak bilbe bat osatzen zuela, eta bertan txertatuta zeudela badia, Santa Katalinako portua (Urumearen bokalean) eta Pasaia bera ere. XIX. mendearen hasiera arte, Pasaiako badiako portuko mugimendua Donostiaren kontrolpean egon zen, eta Pasai San Pedro ingurua hiriburuaren udalbarrutian sartuta gainera.

Partekatutako interesez eta gatazkez osatutako eszenatoki honetan itsasoari lotutako ekonomiaren gune bat finkatu zen, eta hainbat unetan garrantzi handia izan zuen Europa mailan. Eta eszenatoki horretan itsasoari lotutako lanbide sorta zabala garatuko zen. Itsas garraio eta merkataritza, alturako eta baxurako arrantza, baleak harrapatzea, ontzigintza, itsasoko gerrak eta kortsarioren jarduera izan ziren, hainbat mendetan zehar, Donostiako biztanle gehienen bizimodua. Banakako zein kolektibo gisako ahalegin horien baturak osatu du, ber argi eta itzal guztiez, hiriaren muin historikoa.

XIX. mendearen amaieran Donostiak alderdi turistikoa sendotu zuen, bide batez, itsasoarekiko eta merkataritzarekiko lotura tradizionala baztertuz. Arrantza, ordea, suspertu egin zen baporea iritsi zenean eta, zailtasunez bada ere, mantendu egin zen XX. mendean zehar. Gaur egun arrantza jarduerak aurrera segitzen du, duintasunez, ziurgabetasuna nagusi den etorkizunari begira.

Erakusketaren edukiak

Ontzi erromatarrak badian
Arkeologi aurkikuntzek ongi erakusten digute erromatarrak Donostian izan zirela.

Itsas garraioa eta merkataritza
Jatorri gaskoia zuten biztanleen ekarpenaz, Donostia Bizkaiko Golkoko merkataritzaren portu nagusietako bat izan zen Erdi Aroan zehar. Burdina eta artilea oinarri zituen merkatuaren dinamikak asko iraun zuen.

Baleazaleak
XVI. mendean asko zabaldu zen Ozeano Atlantikoaz bestaldeko balearen eta bakailaoaren arrantza. Pasaiako portua basetzat izanik, XVI. mendean Donostia mundu osoko baleazale gune nagusia izatera iritsi zen.

Ontzigintza
Euskal ontzigintzak nazioarte mailan zuen ospearen zati handi bat Donostia-Pasaia inguruko ontziolen lanean zegoen oinarrituta.

Hiri kortsarioa
XVII. mendean Donostia espainiar inperioko jarduera kortsarioaren gune nagusienetako bat izan zen.

Itsasoz haraindiko enpresak
XVIII. mendean Amerikarekiko merkataritzan ari ziren enpresen artean Caracasko Errege Konpainia Gipuzkoarra nabarmendu zen, merkataritza jarduera eta kortsarioa bateratu zituen ontzidi sendo eta ahaltsu batez.

Turismo hiria
Hondartzako turismoa XIX. mendearen amaiera eta XX.aren hasiera bitartean finkatuko zen, eta hiriaren itxura eta izaera eraldatuko zituen.

Arrantza portua
Arrantza da tradizio luzea dutenen artetik Donostian mantentzen den itsas jarduera bakarra. Zuzeneko ekarpen ekonomikoaz gain, oso kontuan hartu behar da hiriaren turismorako duen erakarmena ere, kultur eta nortasun erreferentzia izateaz gain, inolaz ere.

Ordutegia
Asteartetik larunbatera:
-10:00etatik 13:30era
-16:00etatik 19:30era

Igande eta jaiegunetan:
-11:00etatik 14:00etara

Astelehenetan itxita

Zein herri da?

2008-05-23T08:10:50Z

Asmatu al zenuten Ezetz Asmatu! bildumagarri digitalaren laugarren alearen erantzuna? Espoz Mina Jeneralak agindutako Lekarozko sutea, horixe zen irudiaren atzean izkutatzen zen gertakizuna. Asmatu ez bazenuten, lasai; Zumalakarregi Museoak bildumagarriaren bosgarren alea argitaratu berri du eta, beraz, hemen beste aukera bat duzue. Oraingoan, irudian azaltzen den herriaren izena asmatu behar duzue.

]]> Erantzun zuzena bidaltzen baduzue museorako bi sarrera jasoko dituzue doan. Gainera, gainera, urte amaierarako ustekabe atsegin bat prestatu dugu parte-hartzaileentzako. Animatu zaitezte!

Hilabetero bildumagarria posta elektronikoz jasotzeko aukera ere baduzue; horretarako mzumalakarregi@gipuzkoa.net helbidera idatzi baino ez duzue egin behar.

Igartubeiti Baserri Museoa itxita ekainaren 4a arte

2008-05-22T08:55:27Z

Gipuzkoako Foru Aldundiaren Igartubeiti Baserri Museoa ekainaren 4ra bitartean publikoarentzat itxita egongo da arrazoi teknikoak medio.

]]> Egun horretatik aurrera berriz ere izango dugu iraganean murgildu eta XVI. eta XVII. mendeetako euskal baserrien eguneroko bizitza ezagutzeko aukera. Zaharberritutako eraikina jatorrizko egoeran eta garaiko altzari eta tresneriaz hornitua dago, gure arbasoen bizimodua ulertarazteko asmoz: zer jaten eta edaten zuten, nola janzten ziren, zertan egiten zuten lana... Horretaz gain, Interpretazio Zentroak euskal baserriaren historia, ezaugarriak, erabilera eta bilakaera erakusten dizkigu.

Kultur Ondarearen Didaktika

2008-05-21T16:13:39Z

Zumalakarregi Museoak, XIX. mendeko Euskal Herriaz jakiteko eta gozatzeko erreferentzia den zentroak, UEU Udako Euskal Unibertsitatearekin batera, Kultur Ondarearen Didaktikari buruzko ikastaroa antolatu du. 2008ko uztailaren 2an eta 3an eskainiko du Eibarren.

]]> Ikastaro honetan, kultur ondarearen ezagutza, ulermena, balorazioa eta errespetua bultzatzen dituzten proposamen teoriko-praktikoak eskainiko dira, ondarea irakatsi eta ikastea posible dela frogatuz. Proposamen horiek hiru testuingurutan landuko dira: ikastetxean, museoan eta Interneten.

Ondarea eta Ondare-hezkuntza kontzeptuak teorian landuko dira, betiere adibide praktikoei ere erreferentzia eginez. Kultur ondarearen irakaskuntzarako zenbait proposamen eta eredu praktiko ere aztertuz. Museum Cemento Rezolan eta Oiasso Museoan eskaintzen diren zerbitzu eta ekintza didaktikoak ere zuzenean ikusteko aukera izango dute ikasleek.

Ikastaro hau kultur Ondarean interesa duen edonori, edozein mailatako irakasleei eta Pedagogia, Magisteritza, Turismo, Artearen Historia eta Filologiako ikasleei zuzendua dago.

Ikastaroaren prezioa: 72€
Ordu kopurua: 10 ordu
Matrikula egiteko: http://ikastaroak.ueu.org/component/ikastaroak/ikastaro/13.html
Hizkuntza: Euskara
Egitaraua:
- Uztailaren 2a
  - Ondare Kontzeptua
  - Ondare Hezkuntza Kontzeptua
  - Jarduera testuinguruak: Non irakatsi-ikasi ondarea?
  - Ondarea irakatsi eta ikasi museoan
  - Bisita gidatua Rezola Museoan eta Irungo Oiasso Museoan
- Uztailaren 3a
  - Ondarea eskolan irakasteko eta ikasteko ereduak
  - Ondarea irakatsi eta ikasi Interneten

Museoen eguna, egunero

2008-05-19T09:47:45Z

Joan den igandean, hilak 18, Museoen Nazioarteko Eguna ospatu zen. Hala ere, egunero ospatu dezakegu museoen eguna. Egunero gozatu dezakegu Gipuzkoan dugun museo eskaintza zabalaz.

]]> Gipuzkoa Turismo webgunean, bertako museoei buruzko informazio zabala dago eskura. Era guztietako museoak daude aukeran, guztion nahiak asetzeko moduan: artea, etnografia, zientzia eta natura, historia...

Pasaiako Ontziola Ontzi Tradizionalen Ikerketa eta Eraikuntza Zentroan, esaterako, zuzenean ikusi dezakegu nola eraikitzen diren ontziak antzinako teknikak erabilita. Oiartzunen, Herri Musikaren Txokora joan gaitezke, musika-folklorearekin lotutako laurehun musika-tresna ikusi eta entzuteko. Eibarko Armagintzaren Museoan, industria honen historia ezagutu dezakegu, XIV. mendetik gaur arte. Erdi Aroan ere murgildu gaitezke, Segurako Erdi Aroko Interpretazio Zentrora gerturatuta.

Baina hauek adibide bat baino ez dira. Ikusi, ikasi eta gozatzeko Gipuzkoan dugun museo aukera zabalaren adibide bat. Beste asko daude. Gozatu ditzagun urte osoan zehar.

(Igartubeiti Baserri Museoaren argazkiaren egilea: Ardazka)

Museoen Nazioarteko Eguna Untzi Museoan

2008-05-16T11:46:29Z

Maiatzaren 18a Museoen Nazioarteko Eguna da eta Untzi Museoak ospakizunekin bat egingo du. Horregatik, larunbata eta iganderako, hilak 17 eta 18, hainbat ekitaldi prestatu ditu.

]]> Maiatzaren 17an, Untzi Museoa Donostiako museoen jolas erraldoian izango da. Donostiako Museoen Sareak antolatu du jokoa eta goizeko 11:00tik 14:00etara ospatuko da Gipuzkoa plazan. Parte-hartzaile guztiei museoen sareko oparitxo bat banatuko zaie.

Maiatzaren 18rako Ate Irekien Eguna antolatu du Untzi Museoak; beraz, museorako sarrera eta audiogida zerbitzua doakoak izango dira. Gainera, Donostia, Itsas Hiria erakusketa ezagutzeko bisitaldi gidatuak ere egongo dira dohainik, 11:00etan euskaraz eta 12:00etan gaztelaniaz. Hauetan parte hartzeko beharrezkoa da maiatzaren 17ko 13:00ak baino lehen erreserba egitea.

Horretaz gain, Untzi Museoaren web orrian, Donostiako arrantzaren egungo egoera eta etorkizuneko erronkei buruzko erreportaia izango da ikusgai. Bertan, Donostiako portuko arrantza sektorean adierazgarriak diren pertsonen eta adituen testigantzak jasotzen dira. 2007an egin zen erreportaia eta Donostia, Itsas Hiria erakusketaren barruan ere ikus daiteke.

Azkenik, maiatzaren 17an eta 18an zehar, webgunearen bitartez, Donostiako itsas historiari buruzko galderak egiteko aukera izango dute erabiltzaileek. Museoak editatzen duen Itsas Memoria: Revista de Estudios Marítimos del País Vasco aldizkarian parte hartzen duten adituek erantzungo dituzte.

Zumalakarregi Museoak Museoen Nazioarteko eguna ospatuko du

2008-05-15T15:39:37Z

Urtero bezala, Gipuzkoako Foru Aldundiaren Zumalakarregi Museoak, XIX. mendeko Euskal Herria gozatzeko eta ezagutzeko erreferentzia zentroak, Nazioarteko Museo Eguna ospatuko du herriko umeekin. Asteartean, hilak 20, museoaren aurreran elkartuko dira Tirabira Ormaiztegin jokoan aritzeko.

]]> Umeak bi taldetan banatuta (karlistak eta liberalak), herriko plazan barrena ibiliko dira proba bila. Umeak, jeneralaren gidaritzapean, XIX. mendeko pertsonai baten azalean jarriko dira: apaiza, artzaina, bertsolaria, jostuna, mandazaina, ehiztaria, baserritarra, saltzailea, alkatea eta egurgilea. Bakoitzak proba bat gainditu beharko du ordezkatzen duen pertsonaiaren arabera.

Horretaz gain, galdera banari zuzen erantzun beharko diote proba gainditzeko. Aurtengo gaia XIX. mendean gertatutako aldaketa ekonomiko, sozial eta politikoen ingurukoa izango da. Eta partaideek garai hura benetan ezagutzen ote duten frogatu beharko dute: Tomas Zumalakarregik irratia ezagutu ote zuen, Tolosa Gipuzkoako hiriburu izan ote zen, eta abar.

Proba gaindituta, altxorraren bila hasiko dira taldeak, hiru pista aurkitu ondoren, kofreetan zer gordetzen den deskubritu arte. Bi kofre daude, gure joko honetan ez baitu inork galtzen.

Esan bezala, jokoa maiatzaren 20an izango da, 16:30etan hasita. Eta jokoa bukatuta, freskagarri bat hartzeko aukera izango dute.

Gipuzkoari buruzko ikerketa historikoak egiteko bekak

2008-05-09T09:43:56Z

Ireki da honezkero Gipuzkoako Artxibo Orokorraren (AGG-GAO) beken aurtengo deialdia. Uztailaren 15era arteko epea duzu proiektua aurkeztu eta gure iraganari buruzko zure ikuspegia eskaintzeko.

]]> Beste ikertzaile batzuek dagoeneko egin dituzte bere lanak gure Gipuzkoari buruz gehiago jakin dezagun. Gipuzkoako Artxibo Orokorraren webguneko e-liburuen atalean, aurreko urteetako ikerketak irakurri ditzakezu.

Beka eskatu nahi baduzu, ondoko fitxategian duzu baldintzei buruzko informazioa:

Ikerketa historikoak egiteko Gipuzkoako Artxibo Orokorraren bekak (Word, 112 KB)

Kontxako badia XVII. mendean

2008-05-08T14:45:18Z

Gipuzkoako Foru Aldundiaren Untzi Museoak balio historiko eta ikonografiko handiko pieza bat eskuratu du berriki: Bonaventura Peetersek lumaz (sepia tinta urkolore grisarekin) egindako marrazki bat; bertan, Kontxako badia azaltzen da, eta galeoi itzel batzuk nabarmentzen dira. Egileak ondoko data jarri zion bere lanari: 1652. urteko otsailaren 29a.

]]> XIX.mendea baino lehenagoko Donostiari buruzko oso irudi gutxi daude; beraz, pieza honek balio historiko eta ikonografiko handia du hiriarentzat. Kalitate grafiko bikaineko pieza da eta garai jakin bateko Donostia erakusten du; aurreko hamarkadetan kortso-jarduerak izan zuen indarra gutxiagotua zegoen arren, itsas merkataritza hirian indartsu mantentzen zen (Amerikarekiko -Indiatako Ibiliko Ontzidien bidez- eta Europa Atlantiarrarekiko) garaia, hain zuzen.

Irudi honen egilea Bonaventura Peeters -margolaria grabatzailea eta poeta- izan zen. Amberesekoa zen eta ontziz eta marinelez osatutako itsas-pintura ekaiztsuengatik egin zen ezagun. Bere lana Europako hainbat museotan ikus daiteke; besteak beste, Londoneko National Galleryn, Greenwicheko National Maritime Museumen eta Bienako Kunsthistorische Museumen. Marrazkiaren atzealdean, egite-dataz gain, nederlanderaz hauxe dago idatzia: "hauxe da Bonaventura Peetersek egindako azken marrazkia". Eta beste esku batek dio: "eta Itsasoan hil da".

Donostia, itsas hiria
Marrazki hau Untzi Museoan ikus daitekeen Donostia, itsas hiria erakusketan dago ikusgai. Erakusketa honetan, erromatarren garaitik gaur egunera doan ibilibidea egin daiteke hiriaren historian barrena; balio historiko zein artistiko handiko hainbat pieza biltzen ditu erakusketak eta ikus-entzunezko hainbat lan ere badaude hiriaren historian murgiltzeko. Hasiera batean, erakusketa maiatzaren 28an bukatzea zegoen iragarrita, baina, publikoak eta kritikak egindako balorazio positiboak ikusita, azaroaren 2a arte mantenduko da.

Urte bukaeran Untzi Museoak berak sortutako iraupen luzeko beste erakusketa bat eskainiko da: Euskaldunak eta Ozeano Pazifikoa. XVI. mendetik gaur arte, euskaldunek zonalde honetan, Filipinak eta Txina eta Japongo kostaldeak barne, izandako presentzia garrantzitsua aztertuko du erakusketa honek.